បន្ទាយមានជ័យ៖ អភិបាលខេត្តបន្ទាយមានជ័យ និងជាប្រធានគណៈកម្មាធិកាជាតិប្រយុទ្ធប្រឆាំងអំពើជួញដូរមនុស្សខេត្ត លោក អ៊ុំ រាត្រី ជម្រុញដល់កម្លាំងសមត្ថកិច្ចដែលឈរជើងតាមបន្ទាត់ព្រំដែនរួមគ្នាទប់ស្កាត់សកម្មភាពលួចឆ្លងដែនដោយខុសច្បាប់ លោកបានបញ្ជាផងដែរថានៅពេលរកឃើញករណីឆ្លងដែនខុសច្បាប់ត្រូវស្វែងរកឃាត់ខ្លួនមេខ្យល់ឱ្យបានដើម្បីបញ្ជូនទៅតុលាការ។

លោក អ៊ុំ រាត្រី បានជម្រុញបែបនេះនៅឱកាសដែលលោកដឹកនាំកិច្ចប្រជុំត្រួតពិនិត្យសមាសភាពគណៈកម្មាធិកាជាតិប្រយុទ្ធប្រឆាំងអំពើជួញដូរមនុស្សខេត្តបន្ទាយមានជ័យ នៅរសៀលថ្ងៃទី៣០ ខែធ្នូ ឆ្នាំ២០២១ ម្សិលមិញ។

លោកអភិបាលខេត្តបានបញ្ជាក់ថា៖ «បច្ចុប្បន្នមានបងប្អូនពលរដ្ឋពីគ្រប់បណ្តាខេត្តក៏ដូចជាក្នុងខេត្ត បានលួចឆ្លងដែនដោយខុសច្បាប់ទៅរកការងារធ្វើនៅប្រទសថៃ តែត្រូវសមត្ថកិច្ចយើងធ្វើការឃាត់ខ្លួន និងធ្វើអប់រំណែនាំបន្តបន្ទាប់ដោយឡែកមេខ្យល់ដែលបានអូសទាញពលរដ្ឋលួចឆ្លងដែនក៏ត្រូវបានបញ្ជូនទៅតុលាការចាត់ការតាមច្បាប់ជាបន្តបន្ទាប់ផងដែរ។ ដោយឡែកក្រោយពីមានការផ្ទុះរីករាលដាលជំងឺកូវីដ-១៩ ទូទាំងពិភពលោក ប្រទេសថៃបានបញ្ជូនបងប្អូនពលករកម្ពុជាមកប្រទេសកម្ពុជារាប់ម៉ឺននាក់មកកម្ពុជាវិញផងដែរ»។

ជាមួយគ្នានោះលោក អ៊ុំ រាត្រី ក៏បានថ្លែងនូវការអរគុណចំពោះគ្រប់ភាគីពាក់ព័ន្ធកងកម្លាំងប្រដាប់អាវុធគ្រប់ប្រភេទ ដែលបានចូលរួមយ៉ាងសកម្មជាមួយរដ្ឋបាលខេត្ត ក្នុងការជួយសម្រួល ដឹកជញ្ជូនបងប្អូនពលករកម្ពុជាដែលថៃបញ្ជូនមកវិញ។

របាយការណ៍ចុងឆ្នាំ២០២១ សម្រាប់ខេត្តបន្ទាយមានជ័យ មានពលករកម្ពុជាត្រូវចាប់បញ្ជូនមកពីប្រទេសថៃវិញមានចំនួន ៨០ ៦៩២នាក់ ក្នុងនោះមានស្រី ៣១ ៩៤៧នាក់ និងកុមារ ៨ ៧៨៨នាក់។ ក្នុងនោះមណ្ឌលសំចតប៉ោយប៉ែតទទួលបានពលករចំនួនជាង ៥ម៉ឺន៧ពាន់នាក់ ច្រកអូរបីជាន់ទទួលពលករបានជាង៦ម៉ឺន២ពាន់នាក់ ច្រកម៉ាឡៃទទួលបានជាង៧ពាន់៥រយនាក់ ច្រកបឹងត្រកួននិងអូរស្មាច់ទទួលបានពលករបានជាង៤ពាន់៦រយនាក់៕